Հայաստանի առաջին նախագահ Լևոն Տեր-Պետրոսյանն այսօր իր առանձնատանը հյուրընկալել է Ամենայն Հայոց կաթողիկոս Գարեգին Երկրորդին:
«Շուրջ մեկ ժամ տևած զրույցի ընթացքում, Հայաստանի ներկայիս իրավիճակի գնահատականից բացի, անդրադարձ է կատարվել նաև Սամվել Կարապետյանի նկատմամբ Փաշինյանի կողմից սանձազերծված հաշվեհարդարին, ինչի առիթը Եկեղեցու դեմ իշխանությունների հայտարարած պատերազմի համատեքստում վերջինիս արած հետևյալ հայտարարությունն է. «Եթե չհաջողվի քաղաքական գործիչներին, ուրեմն մենք էլ մեր ձևով ենք մասնակցելու այդ ամեն ինչին»: Խոսք, որը ոչ այլ ինչ է, եթե ոչ սովորական քաղաքական հայտարարություն, ինչի իրավունքը, որպես Հայաստանի քաղաքացի, նա ունի», - ասված է առաջին նախագահի խոսնակի հաղորդագրությունում:
«Նախագահի գնահատմամբ՝ Փաշինյանը պարտության մարմնավորում է։ Նա խայտառակ կերպով պարտվեց արցախյան պատերազմում, հաստատաբար պարտվելու է նաև Հայոց եկեղեցուն հայտարարած պատերազմում», -նշված է Արման Մուսինյանի հաղորդագրությունում:
Սա այս ամիս Հայաստանի առաջին նախագահի և Ամենայն Հայոց կաթողիկոսի երկրորդ հանդիպումն է, Տեր-Պետրոսյանը նաև մեկնաբանություններով է հանդես եկել Հայաստանի իշխանության և եկեղեցու միջև հակամարտության առնչությամբ:
