Դուբայի օդանավակայանները հայտարարում են, որ կարճատև դադարից հետո վերագործարկվել են, հնարավոր են որոշ ուշացումներ կամ չեղարկումներ։ Այս մասին հայտնել է Դուբայի մեդիա գրասենյակը X հարթակում։
Քաթարի մայրաքաղաք Դոհայից այսօր նախատեսված էր թռիչք Երևան: QatarAirways -ի օդանավը պետք է վայրէջք կատարեր «Զվարթնոց»-ում 0:25-ին, ապա 3 ժամ անց Երևանից ուղևորների տեղափոխեր Դոհա:
Մինչև այս պահը թռիչքն անորոշ ժամկետով հետաձգված է:
ԱԱՄՆ-ը «ուշադիր հետևում է իրավիճակին»
Պենտագոնը հաստատել է, որ Իրանը մի քանի կարճ և միջին հեռահարության հրթիռներ է արձակել Քաթարի Ալ Ուդեյդ ավիաբազայի ուղղությամբ:
«Այս պահին Ամերիկայի զոհերի մասին տեղեկություններ չկան», - հայտարարել է ԱՄՆ ռազմական գերատեսչությունը, հավելելով՝ «մենք ուշադիր հետևում ենք իրավիճակին»:
«Միջազգային իրավունքի կոպիտ խախտում»
Սաուդյան Արաբիան «ամենախիստ կերպով» դատապարտել է Իրանի հարձակումը Քաթարի վրա՝ այն անվանելով «միջազգային իրավունքի կոպիտ խախտում»:
Իրանն ու Սաուդյան Արաբիան վերջին տարիներին սերտացրել էին համագործակցությունը, սակայն Քաթարում ամերիկյան ռազմակայանի ուղղությամբ իրանական հարձակումը կարող է սասանել այդ հարաբերությունները, գրում է NYT-ը:
Քուվեյթը և Իրաքը փակել են իրենց օդային տարածքը՝ Մերձավոր Արևելքում խորացող արճակատման ֆոնին։ Մինչ այդ նման որոշում էին կայացրել նաև Քաթարը, Արաբական Միացյալ Էմիրություններն ու Բահրեյնը։
Իրանը հրթիռներ է արձակել Քաթարում գտնվող ամերիկյան բազաների վրա
Իրանը պատասխանել է ԱՄՆ ռազմաօդային ուժերի ռմբակոծություններին Քաթարում գտնվող ամերիկյան ռազմաբազաների վրա վեց բալիստիկ հրթիռ արձակելով, հաղորդում է Axios-ը՝ հղում անելով իսրայելական պաշտոնյաներին։
Axios-ի լրագրող Բարաք Ռավիդը X-ում հայտնել է, որ Իրանը վեց հրթիռ է արձակել Քաթարում գտնվող ամերիկյան բազաների վրա։ Նմանատիպ տեղեկատվություն է հաղորդել նաև Haaretz թերթը՝ հղում անելով իսրայելական աղբյուրին։
Պայթյուններ են լսվել Քաթարի մայրաքաղաք Դոհայում, հաղորդում են TASS-ը և Reuters-ը։ Ենթադրաբար, դրանք առաջացել են հակաօդային պաշտպանության համակարգերից։
Հարվածից մոտ 20 րոպե առաջ Քաթարը փակել է իր օդային տարածքը։
Բունկերում թաքնված Խամենեին ժառանգորդ է փնտրում, հաղորդում են արևմտյան լրատվամիջոցները:
«Ցանկացած երկիր իրավունք ունի զարգացնել միջուկային խաղաղ ծրագիրը», - մեկնաբանելով Իրանի շուրջ ծավալվող զարգացումները` այսօր հայտարարել է Ռուսաստանի նախագահի մամուլի քարտուղար Դմիտրի Պեսկովը։
«Մեր կարծիքով` բոլոր երկրներն էլ ատոմային էլեկտրակայաններ շահագործելու, միջուկային խաղաղ ծրագիր զարգացնելու իրավունք ունեն։ Մենք պնդում ենք մեր այս մոտեցումը», - ասել է Պեսկովը։
Կրեմլի խոսնակը նաև ընդգծել է, որ ԱՄՆ կողմից Իրանին հասցված հարվածներն աննախադեպ են։ «Որևէ մեկը դեռ չի կարող գնահատել դրանց հետևանքները», - նշել է Դմիտրի Պեսկովը։
Իրանական լրատվամիջոցների հաղորդագրությունների և սոցիալական ցանցերում հրապարակված լուսանկարների համաձայն՝ Իսրայելը հունիսի 23-ին ուժեղացրել է հարվածները Թեհրանի տարբեր շրջանների նկատմամբ, և մայրաքաղաքի բազմաթիվ թաղամասերից ծուխ է բարձրանում:
Հաղորդագրությունների համաձայն՝ Իրանի պետական հեռարձակող IRIB-ի շենքերից մեկը եղել է հարձակման թիրախներից։ Լրատվական ալիքի ուղիղ եթերը ընդհատվել է, սակայն հեռուստաընկերության մնացած ալիքները շարունակում են հեռարձակվել։
Ուկրաինայի արտաքին գործերի նախարար Անդրեյ Սիբիգան հայտարարել է, որ Ռուսաստանը չի կարող միջնորդի դեր կատարել Մերձավոր Արևելքում ծավալվող հակամարտության հարցում: Իրանի արտգործնախարար Աբբաս Արաղչին այսօր ժամանել է Մոսկվա Ռուսաստանի բարձրագույն ղեկավարության, այդ թվում՝ նախագահ Վլադիմիր Պուտինի հետ բանակցությունների համար։