Պատերազմ Ուկրաինայում (լայվ բլոգ, թարմացվող)

Ուկրաինայում «չկա ոչ մի բելառուս զինվոր», «ոչ մի բելառուսական փամփուշտ», հայտարարել է Բելառուսի նախագահ Ալեքսանդր Լուկաշենկոն` ի պատասխան Ուկրաինայի նախագահ Վլադիմիր Զելենսկու կոչին։

«Բելառուսի տարածքից պատերազմ չի ընթանում,- նշել է Լուկաշենկոն,- մենք օգնու՞մ ենք ռուսներին, իհարկե, օգնում ենք: Եթե նրանք մեզ դիմում են լուրջ վնասվածքներով, մենք նրանց բուժում ենք: Եվ ի՞նչ վատ բան կա դրանում», - հայտարարել է Լուկաշենկոն:

Ուկրաինայի նախագահ Վլադիմիր Զելենսկին Twitter-ում այսօր տեղադրած գրառմամբ հայտնել է, որ Ուկրաինան Ռուսաստանի դեմ հայց է ներկայացնում Հաագայում տեղակայված ՄԱԿ-ի Միջազգային դատարան:

Զելենսկու փոխանցմամբ, Ուկրաինան պահանջում է, որ լսումները մեկնարկեն արդեն գալիք շաբաթվա ընթացքում:

Չեխիայի վարչապետ Պետր Ֆիալան հայտարարել է, որ հետայսու իր երկիրը Կիևին կտրամադրի նախկինի համեմատությամբ «ավելի լուրջ զինատեսակներ»:

Նրա փոխանցմամբ` այսօր Պրահայում կառավարությունը պետք է հավանություն տա այդ զինատեսակներն Ուկրաինային տրամադրելու առաջարկին:

Գերմանիան 3 ամսով փակում է երկինքը ռուսական ինքնաթիռների համար, հայտնում է երկրի տրանսպորտի նախարարությունը։

Շվեդիան նույնպես կփակի օդային տարածքը

Նման մտադրության մասին ավելի վաղ հայտնել էին Դանիան, Բելգիան և Իսլանդիան:

Ուկրաինայի նախագահ Վլադիմիր Զելենսկին հայտնել է, որ զրուցել է Բելառուսի նախագահ Ալեքսանդր Լուկաշենկոյի հետ։ Այլ մանրամասներ նա չի փոխանցել:

Ռուսաստանի նախագահ Վլադիմիր Պուտինի գործողությունները սպառնում են Եվրոպայի անվտանգությանը, նա ցանկանում է վերստեղծել ռուսական կայսրությունը, Բունդեսթագում ելույթի ժամանակ հայտարարել է Գերմանիայի կանցլերը։

Ուկրաինայի և Ռուսաստանի միջև բանակցություններ կանցկացվեն Գոմելում։ Ուկրաինան համաձայնել է մասնակցել հանդիպմանը, հաստատում են ուկրաինական աղբյուրները։

Ուկրաինական կողմը կներկայացնի փոխարտգործնախարար Նիկոլայ Տոչիցկին

Ռուսաստանի բանակը նախագահ և գերագույն գլխավոր հրամանատար Վլադիմիր Պուտինի հրամանով այսօրվանից անցնում է ծառայության հատուկ ռեժիմի: Պուտինի խոսքով, նա այդ որոշումն է կայացրել, հաշվի առնելով Ռուսաստանի հասցեին Արևմուտքի ղեկավարների ագրեսիվ հայտարարությունները:

Շոյգուի և Գերասիմովի հետ զրույցում Պուտինը նաև նշել է, թե «արևմտյան երկրները Ռուսաստանի նկատմամբ անբարյացակամ գործողությունների են դիմում տնտեսական ասպարեզում»:

Եվրոպական հանձնաժողովի նախագահ Ուրսուլա ֆոն դեր Լայենն այսօր ասել է, որ Եվրամիությունը որոշել է դադարեցնել Ռուսաստանի Կենտրոնական բանկի հետ բոլոր գործարքները և սառեցնել դրա ակտիվները: Այդ մասին նա ասել է այսօր Բրյուսելում տեղի ունեցած ասուլիսում:

Եվրոպական հանձնաժողովի նախագահ Ուրսուլա ֆոն դեր Լայենն այսօր Բրյուսելում հայտնել է, որ Եվրոպական միությունը որոշել է ամբողջությամբ փակել օդային տարածքը Ռուսաստանի համար:

Եվրոպական հանձնաժողովի նախագահի փոխանցմամբ, պատժամիջոցը տարածվում է ռուսական բոլոր, այդ թվում` մասնավոր օդանավերի վրա: