Պատերազմ Ուկրաինայում (լայվ բլոգ, թարմացվող)

Ուկրաինայի դեմ պատերազմի չորրորդ օրը Ռուսաստանի ռազմական գերատեսչությունը առաջին անգամ հայտարարել է ռուսաստանցի զինվորականների շրջանում զոհերի մասին, թվեր, սակայն, չի նշել։

«Ռուս զինվորականները խիզախություն և հերոսություն են ցուցաբերում հատուկ ռազմական գործողությունների ընթացքում մարտական առաջադրանքները կատարելիս», - ասվում է ՌԴ պաշտպանության նախարարության հայտարարության մեջ, որը մեջբերում է «ՌԻԱ Նովոստի» պետական գործակալությունը:

«Ցավոք, մեր ընկերներից զոհեր և վիրավորներ կան։ Բայց մեր կորուստները բազմակի քիչ են, քան ոչնչացված ազգայնականները և ուկրաինական զինված ուժերի զինծառայողների կորուստները», - շեշտել է ռազմական գերատեսչությունը։

Սպիտակ տան մամուլի քարտուղար Ջեն Սաքին հայտարարել է, որ Կրեմլի ղեկավար Վլադիմիր Պուտինի՝ Ռուսաստանի միջուկային զսպման միջոցները բարձր զգոնության բերելու մասին որոշումը «գոյություն չունեցող սպառնալիքներ ստեղծելու» շարունակությունն է:

Ռուսաստանի նախագահի որոշմանը արձագանքել է նաև ՆԱՏՕ-ի գլխավոր քարտուղար Յենս Ստոլտենբերգը։ CNN հեռուստաընկերության հետ զրույցում արևմտյան ռազմական դաշինքի ղեկավարը Պուտինի հայտարարությունները որակել է «վտանգավոր հռետորաբանություն» ու անպատասխանատու պահվածք ռուսաստանցի առաջնորդի կողմից։

Եվրամիությունը ցանկանում է ամեն ինչ անել Ուկրաինային աջակցելու համար և որոշել է 450 միլիոն եվրոյի չափով մարտական զենք տրամադրել ուկրաինական բանակին և ևս 50 մլն եվրո՝ ոչ մարտական պաշարների համար։

«Այո, այն տաբուն, որ Եվրամիությունը մարտական զենք չի տրամադրում երրորդ երկրի, այլևս չի գործում, այո, մենք դա անում ենք այս պատերազմում ուկրաինացիներին օգնելու համար», - հայտարարել են ԵՄ ղեկավարները։

ԵՄ արտաքին քաղաքականության պատասխանատու Ժոզեպ Բորելն ընդգծել է, որ Ռուսաստանը հստակորեն սպառնացել է միջուկային հարձակմամբ այն երկրների դեմ, որոնք աջակցում են Ուկրաինային փետրվարի 24-ին ռուսական ներխուժումից հետո, և չնայած սրան՝ եվրոպացիները մտադիր են հնարավորինս աջակցել Կիևին։

Արևմտյան լրատվամիջոցները գրում են, որ Պուտինի երեկվա սպառնալիքից հետո աշխարհը փոխվել է, և երրորդ համաշխարհային պատերազմն արդեն հավանական է թվում։

Այսօր Միացյալ Նահանգների նախագահը մտադիր է դաշնակիցների հետ քննարկել Ուկրաինայում Ռուսաստանի գործողությունների պատասխանը։ Քննարկումը նախատեսված է Մոսկվայի ժամանակով ժամը 19։15-ին։

Երեկվանից համացանցում տարածվել է տեղեկություն, որ ռուսական ռուբլին աննախադեպ արժեզրկում է արձանագրում․ առավոտյան 1 դոլարը Forex բորսայում վաճառվում է 110-120 ռուբլու սահմաններում, իսկ փոխանակման կետերում այն ընդհանրապես հնարավոր չէ գնել երեկվանից։

Ռուսաստանցիները երեկ ամբողջ օրը բողոքում էին նաև, որ դժվարությամբ են կարողանում կանխիկացնել նույնիսկ ռուբլին, որոշ բանկոմատներ Մոսկվայում, օրինակ, տալիս էին միայն 1000 ռուբլի։

Մեծանում է նաև պատերազմի դեմ բողոքի ալիքը Ռուսաստանում։ Մի քանի օր է՝ երկրի տարբեր քաղաքներում շարունակվում են բողոքի ակցիաները։ Ոստիկանությունը ամեն օր հազարավոր մարդկանց է բերման ենթարկում։

Միացյալ Նահանգների քաղաքացիները պետք է մտածեն կոմերցիոն թռիչքներով Ռուսաստանից անհապաղ հեռանալու մասին, երեկ հայտարարել է Պետդեպարտամենտը՝ նշելով, որ աճում է այն ավիաընկերությունների թիվը, որոնք չեղարկում են թռիչքները, նաև թվարկելով երկրները, որոնք Ռուսաստանի համար փակում են օդային տարածքը Ուկրաինա ներխուժումից հետո:

Երեկ ՄԱԿ-ի Անվտանգության խորհուրդը Գլխավոր ասամբլեայի արտակարգ նիստ հրավիրեց Ուկրաինա Ռուսաստանի ներխուժման հարցով։

Նիստը տեղի կունենա այսօր։ Քվեարկությունը 15 երկիր ընդգրկող Անվտանգության խորհրդում ընթացակարգային բնույթ ուներ, և Ռուսաստանը չէր կարող օգտվել վետոյի իրավունքից։ Ձայների 11 կողմ, 1 դեմ և 3 ձեռնպահ հարաբերակցությամբ որոշում ընդունվեց Գլխավոր ասամբլեայի նիստ գումարելու մասին։ Որոշմանը դեմ քվեարկեց Ռուսաստանը, ձեռնպահ՝ Չինաստանը, Հնդկաստանը և Արաբական Միացյալ Էմիրությունները։

Ռուսաստանի բանկը որոշել է բարձրացնել վերաֆինանսավորման տոկոսադրույքը 10,5 տոկոսային կետով՝ հասցնելով տարեկան 20 տոկոսի:

Հիմնական տոկոսադրույքի բարձրացումը կօգնի պահպանել ֆինանսական և գների կայունությունը, պաշտպանել քաղաքացիների խնայողությունները արժեզրկումից, նշել է Ռուսաստանի Դաշնության կենտրոնական բանկը։